మోదీ–జిన్పింగ్ భేటీకి రంగం సిద్ధం.. భారత్–చైనా సంబంధాల్లో కీలక మలుపు?
న్యూఢిల్లీ: భారత్–చైనా సంబంధాల్లో కీలక పరిణామానికి రంగం సిద్ధమైంది. చైనా అధ్యక్షుడు షీ జిన్పింగ్ న్యూఢిల్లీలో జరిగే 18వ BRICS శిఖరాగ్ర సమావేశానికి హాజరుకానుండగా.. సెప్టెంబర్ 12న ప్రధాని నరేంద్ర మోదీతో ద్వైపాక్షిక భేటీ జరగనున్నట్లు తాజా నివేదికలు వెల్లడిస్తున్నాయి.
2020 గల్వాన్ ఘర్షణ తర్వాత భారత్లో మోదీ–జిన్పింగ్ ముఖాముఖి భేటీ జరగడం ఇదే తొలిసారి కావడంతో ఈ సమావేశంపై అంతర్జాతీయంగా ఆసక్తి నెలకొంది. సరిహద్దు వివాదం కారణంగా గత కొన్నేళ్లుగా ఇరు దేశాల మధ్య సంబంధాలు తీవ్ర ఒడిదుడుకులను ఎదుర్కొన్నాయి.
LAC పరిస్థితిపై కీలక చర్చ
మోదీ–జిన్పింగ్ చర్చల్లో వాస్తవాధీన రేఖ వెంబడి పరిస్థితి ప్రధాన అంశంగా ఉండే అవకాశం ఉంది. సరిహద్దులో శాంతి, స్థిరత్వం కొనసాగించడంతో పాటు మిగిలిన సమస్యలను దౌత్యపరమైన చర్చల ద్వారా పరిష్కరించుకునే అంశంపై ఇరువురు నేతలు చర్చించే అవకాశం ఉంది.
వాణిజ్యం, పెట్టుబడులపై ఫోకస్
భారత్–చైనా మధ్య భారీ స్థాయిలో వాణిజ్యం కొనసాగుతున్నప్పటికీ.. పెట్టుబడులు, మార్కెట్ యాక్సెస్, హైటెక్ పరికరాల దిగుమతులు వంటి అంశాల్లో భారత్ ఇంకా అప్రమత్తంగా వ్యవహరిస్తోంది. ఇరు దేశాల మధ్య ఆర్థిక సంబంధాలను సాధారణ స్థితికి తీసుకురావడంపై కూడా చర్చ జరిగే అవకాశం ఉంది.
BRICS వేదికగా కీలక భేటీ
సెప్టెంబర్ 12, 13 తేదీల్లో న్యూఢిల్లీలో జరిగే BRICS సదస్సుకు భారత్ అధ్యక్షత వహిస్తోంది. గ్లోబల్ గవర్నెన్స్, ఆర్థిక సహకారం, ఇంధన భద్రత, సరఫరా గొలుసులు, టెక్నాలజీ, గ్రీన్ ఎనర్జీ వంటి అంశాలపై సభ్య దేశాలు చర్చించనున్నాయి.
ఈ నేపథ్యంలో మోదీ–జిన్పింగ్ భేటీ భారత్–చైనా సంబంధాలకు మాత్రమే కాకుండా BRICS భవిష్యత్ దిశకు కూడా కీలకంగా మారనుంది. సరిహద్దు అంశాల్లో పురోగతితో పాటు వాణిజ్య, ఆర్థిక సంబంధాల్లోనూ కొత్త మార్గాలు తెరుచుకుంటాయా అన్నది ఇప్పుడు ఆసక్తికరంగా మారింది.
