విశాఖపట్నం: సెప్టెంబర్ 14న సాయంత్రం ఆకాశంలో అద్భుతమైన ఖగోళ దృశ్యం ఆవిష్కృతమైంది. సన్నని నెలవంకకు సమీపంలో అత్యంత ప్రకాశవంతంగా కనిపించిన శుక్రగ్రహం చూపరులను ఆకట్టుకుంది. నెలవంక పక్కనే మెరిసిన శుక్రుడు.. తోకచుక్కలా కనిపిస్తూ ఆకాశప్రియులకు కనువిందు చేశాడు.
సూర్యాస్తమయం అనంతరం పశ్చిమ ఆకాశంలో కనిపించిన ఈ దృశ్యాన్ని పలుచోట్ల ప్రజలు ఆసక్తిగా వీక్షించారు. చంద్రుడు–శుక్రుడు ఒకదానికొకటి ఎంతో సమీపంగా కనిపించడంతో ఆకాశంలో అందమైన జంటలా దర్శనమిచ్చారు. శుక్రుడు ప్రస్తుతం అత్యంత ప్రకాశవంతంగా కనిపించే దశలో ఉండటంతో ఈ దృశ్యం మరింత ఆకర్షణీయంగా మారింది.
ఇదే ఖగోళ ఘటనలో భాగంగా కొన్ని ప్రాంతాల్లో లూనార్ ఆకల్టేషన్ కూడా చోటుచేసుకుంది. అంటే భూమి నుంచి చూస్తున్నప్పుడు చంద్రుడు శుక్రుడికి అడ్డుగా రావడంతో కొంతసేపు శుక్రుడు చంద్రుడి వెనుక కనిపించకుండా పోయాడు. అనంతరం మళ్లీ చంద్రుడి అంచు వెనుక నుంచి శుక్రుడు కనిపించాడు.
చంద్రుడు–శుక్రుడి ఈ అరుదైన కలయికను పలువురు తమ మొబైల్ కెమెరాల్లో చిత్రీకరించి సోషల్ మీడియాలో పంచుకున్నారు. “నెలవంకకు తోకచుక్కలా శుక్రుడు”, “ఆకాశంలో అద్భుత దృశ్యం” అంటూ నెటిజన్లు ఈ ఖగోళ వింతపై స్పందిస్తున్నారు.
ఖగోళ శాస్త్రంలో చంద్రుడు మరో ఖగోళ వస్తువును మన దృష్టి నుంచి తాత్కాలికంగా కప్పివేసే ప్రక్రియను ఆకల్టేషన్ (Occultation) అంటారు. సెప్టెంబర్ 14న జరిగిన శుక్రుడి ఆకల్టేషన్ ప్రపంచంలోని కొన్ని ప్రాంతాల్లో కనిపించేలా ఏర్పడింది.
