ప్రముఖ కంటెంట్ క్రియేటర్లను తమ వైపు తిప్పుకునేందుకు దిగ్గజ స్ట్రీమింగ్ ప్లాట్ఫామ్లు యూట్యూబ్, నెట్ఫ్లిక్స్ మధ్య తీవ్రమైన పోటీ నెలకొంది. స్టార్ యూట్యూబర్లను తమ ప్లాట్ఫామ్కే పరిమితం చేసేందుకు, వారికి మిలియన్ల డాలర్ల విలువైన ఆర్థిక ప్రోత్సాహకాలను అందించడానికి యూట్యూబ్ సిద్ధమైంది. ఈ మేరకు బ్లూమ్బర్గ్ ఒక కథనంలో, సంబంధిత చర్చల గురించి తెలిసిన వ్యక్తులను ఉటంకిస్తూ ఆసక్తికర సంగతులు వెల్లడించింది.
ప్రముఖ యూట్యూబ్ ఛానెళ్లను దక్కించుకునేందుకు నెట్ఫ్లిక్స్ తీవ్రంగా ప్రయత్నిస్తుండటంతో, యూట్యూబ్ ఈ ఎదురుదాడికి దిగింది. తమ వీడియోలను కొంతకాలం పాటు యూట్యూబ్లో మాత్రమే ప్రత్యేకంగా విడుదల చేసే క్రియేటర్లకు భారీ మొత్తంలో డబ్బు ఆఫర్ చేస్తోంది. ఇందులో భాగంగా కొన్ని కార్యక్రమాల నిర్మాణానికి నేరుగా నిధులు సమకూర్చడం లేదా పెద్ద బ్రాండ్ డీల్స్లో వాటా ఇవ్వడం వంటివి ఉన్నాయి. ఇప్పటికే పలువురు భాగస్వాములతో యూట్యూబ్ ఒప్పందాలకు దగ్గరగా ఉన్నట్లు సమాచారం.
ఒకేసారి యూట్యూబ్, నెట్ఫ్లిక్స్లో వీడియోలను విడుదల చేసే క్రియేటర్లపై పరోక్షంగా ఒత్తిడి పెంచేందుకు కూడా యూట్యూబ్ సిద్ధమవుతోంది. అలాంటి వారికి మార్కెటింగ్ క్యాంపెయిన్లలో ప్రాధాన్యం తగ్గించడం, ప్రత్యేక ఈవెంట్లకు ఆహ్వానించకపోవడం, బ్రాండ్ డీల్స్ ద్వారా వచ్చే ఆదాయంలో వాటాను తగ్గించడం వంటి చర్యలు తీసుకునే అవకాశం ఉందని తెలుస్తోంది.
