నిత్యావసర సరుకుల ధరలు సామాన్యుడిపై భారం కాకుండా నియంత్రించేందుకు ఆంధ్రప్రదేశ్ ప్రభుత్వం చర్యలు చేపట్టనుంది. **ధరలకు కళ్లెం వేయడం ద్వారానే ద్రవ్యోల్బణాన్ని నియంత్రించగలమని సీఎం నారా చంద్రబాబు నాయుడు** స్పష్టం చేశారు. వ్యవసాయం, అనుబంధ రంగాలపై నిర్వహించిన ఉన్నతస్థాయి సమీక్షలో అధికారులకు పలు కీలక ఆదేశాలు ఇచ్చారు.

పంటల ఉత్పత్తి, సరఫరా, మార్కెట్ పరిస్థితులను ముందుగానే అంచనా వేసి ప్రణాళికాబద్ధంగా వ్యవహరించాలని సీఎం సూచించారు. ఉత్పత్తి, డిమాండ్ మధ్య వ్యత్యాసం, సరఫరాలో లోపాలు, ధరల పెరుగుదలకు కారణాలను క్షేత్రస్థాయిలో పరిశీలించి చర్యలు తీసుకోవాలని ఆదేశించారు.

ధరల నియంత్రణకు అవసరమైన చోట **మార్కెట్ జోక్యం** చేపట్టాలని చంద్రబాబు తెలిపారు. కేంద్రం ప్రకటించిన కనీస మద్దతు ధరలను రాష్ట్రంలో సమర్థంగా అమలు చేయడంతో పాటు, రైతులను డిమాండ్‌కు అనుగుణంగా పంటలు సాగు చేసేలా ప్రోత్సహించాలని సూచించారు. అవసరమైతే రైతుల నుంచి నేరుగా పంటలు కొనుగోలు చేసేందుకు బై-బ్యాక్ ఒప్పందాలు చేసుకోవాలని అన్నారు.

రాష్ట్రంలోని రైతు బజార్లు, రేషన్ డిపోల ద్వారా దాదాపు **60 రకాల నిత్యావసర సరుకులను ప్రజలకు అందించేలా చర్యలు తీసుకోవాలని** ఆదేశించారు. తక్షణమే ఉల్లి, కందిపప్పు వంటి సరుకులను అందుబాటులోకి తీసుకురావాలని, పామాయిల్‌ను కూడా రేషన్ డిపోల ద్వారా సరఫరా చేసే అవకాశాలను పరిశీలించాలని సూచించారు.

రాష్ట్రంలో సాగుకు దూరంగా ఉన్న **8.61 లక్షల హెక్టార్ల భూమిలో వర్షాధార పంటల సాగును ప్రోత్సహించాలని** సీఎం ఆదేశించారు. రాగి, కొర్రలు, జొన్న, సజ్జలు, మొక్కజొన్న, ఉలవలు వంటి పంటలపై దృష్టి పెట్టాలని సూచించారు. రైతు సేవా కేంద్రాల వారీగా పంటల వివరాలు సేకరించి, మార్కెట్ డిమాండ్‌కు అనుగుణంగా సాగు ప్రణాళికలు రూపొందించాలని తెలిపారు.

అధిక వర్షాభావ పరిస్థితులతో ప్రమాదంలో ఉన్న **3.61 లక్షల హెక్టార్ల ఉద్యాన పంటలను రక్షించేందుకు రూ.190 కోట్లు** కేటాయిస్తున్నట్లు చంద్రబాబు ప్రకటించారు. లైఫ్ సేవింగ్ ఇరిగేషన్ కింద వాటర్ ట్యాంకర్ల ద్వారా నీటిని అందించడం వంటి తక్షణ చర్యలు చేపట్టాలని అధికారులను ఆదేశించారు. ఎల్‌నినో ప్రభావాన్ని ఎదుర్కొనేందుకు రాష్ట్ర ప్రభుత్వం తీసుకుంటున్న చర్యలపై కేంద్రానికి ప్రతినెలా నివేదిక పంపాలని సూచించారు.

ఆంధ్రప్రదేశ్ మైక్రో ఇరిగేషన్ ప్రాజెక్టుకు **ISSA Global Award-2026** లభించడంపై అధికారులను సీఎం అభినందించారు. సమీక్షలో మంత్రులు అచ్చెన్నాయుడు, నిమ్మల రామానాయుడు, నాదెండ్ల మనోహర్‌తో పాటు ఆయా శాఖల ఉన్నతాధికారులు పాల్గొన్నారు.