సంగారెడ్డి జిల్లా పటాన్చెరు మండలం పెద్దకంజర్ల గ్రామ శివారులోని నేరేడు చెరువులో వినాయక నిమజ్జనం సందర్భంగా తీవ్ర విషాదం చోటుచేసుకుంది. నిమజ్జనం కోసం వెళ్లిన **శిరీష అనాథాశ్రమానికి చెందిన ఆరుగురు విద్యార్థులు నీటిలో మునిగి మృతి చెందారు.**
ప్రమాదంపై సమాచారం అందుకున్న పటాన్చెరు పోలీసులు వెంటనే ఘటనా స్థలానికి చేరుకుని గజ ఈతగాళ్ల సహాయంతో గాలింపు చేపట్టారు. మృతదేహాలను వెలికితీసి పోస్టుమార్టం నిమిత్తం పటాన్చెరు ప్రభుత్వ ఆసుపత్రికి తరలించారు.
మృతులను **నర్సింహ రాజు, సుమంత్, గణేశ్, ఉదయ్ కిరణ్, శ్యామ్ కుమార్, సిద్ధార్థ్**గా గుర్తించారు. వీరిలో పలువురు డిప్లొమా విద్యార్థులు కాగా, సిద్ధార్థ్ 10వ తరగతి చదువుతున్నట్లు అధికారులు తెలిపారు.
ఘటన విషయం తెలుసుకున్న పటాన్చెరు ఎమ్మెల్యే గూడెం మహిపాల్ రెడ్డి ఆసుపత్రికి చేరుకుని మృతదేహాలను పరిశీలించారు. అనాథాశ్రమ నిర్వాహకులను పరామర్శించి తన సానుభూతిని తెలిపారు.
రేవంత్ రెడ్డి దిగ్భ్రాంతి
పెద్దకంజర్లలో ఆరుగురు విద్యార్థులు మృతి చెందిన ఘటనపై తెలంగాణ ముఖ్యమంత్రి రేవంత్ రెడ్డి తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. బాధిత కుటుంబాలను ఆదుకోవాలని జిల్లా యంత్రాంగాన్ని ఆదేశించారు. వినాయక నిమజ్జనం సందర్భంగా అన్ని ప్రాంతాల్లో తగిన జాగ్రత్తలు తీసుకోవాలని అధికారులకు సూచించారు.
