ఒక్కొక్కరికి రూ.2 కోట్లకు పైగా పరిహారం కోరే అవకాశం.. 100 మంది ప్రయాణికులతో కమిటీ ఏర్పాటు
ఫ్లై దుబాయ్ విమానంలో చోటుచేసుకున్న తీవ్ర భద్రతా ఘటన ఇప్పుడు న్యాయపోరాటానికి దారితీస్తోంది. ఈ ఘటనతో మానసిక ఆందోళన, ఇబ్బందులు ఎదుర్కొన్న ప్రయాణికులు పరిహారం కోసం కోర్టును ఆశ్రయించేందుకు సిద్ధమవుతున్నట్లు ఇజ్రాయెల్‌ మీడియా కథనాలు వెల్లడించాయి.
సెప్టెంబర్‌ 30న దుబాయ్ నుంచి ఇజ్రాయెల్‌లోని టెల్‌ అవీవ్‌కు వెళ్తున్న ఫ్లై దుబాయ్ FZ1073 విమానంలో సహ పైలట్‌ ప్రధాన పైలట్‌పై దాడి చేసి విమానాన్ని అదుపులోకి తీసుకునేందుకు ప్రయత్నించినట్లు అధికారులు వెల్లడించారు. విమానంలోని ప్రయాణికులు, సిబ్బంది జోక్యంతో పరిస్థితిని అదుపులోకి తీసుకురావడంతో విమానాన్ని సౌదీ అరేబియాలోని తబూక్‌లో సురక్షితంగా దించారు.
పరిహారం కోసం ప్రత్యేక కమిటీ
ఈ ఘటనలో ప్రయాణించిన 174 మందిలో సుమారు 100 మంది ప్రయాణికులు పరిహారం కోసం న్యాయపోరాటాన్ని సమన్వయం చేసేందుకు కమిటీని ఏర్పాటు చేసుకున్నట్లు ఇజ్రాయెల్‌ మీడియా కథనాలు పేర్కొన్నాయి. ప్రయాణికుల తరఫున న్యాయవాదులను నియమించుకోవడం, సంబంధిత సంస్థలు, ప్రభుత్వ అధికారులపై చట్టపరమైన చర్యలు తీసుకునే అంశాలను ఈ కమిటీ పరిశీలిస్తున్నట్లు సమాచారం.
విమానయాన సంస్థతో పాటు ఇజ్రాయెల్‌, యునైటెడ్‌ అరబ్‌ ఎమిరేట్స్‌ (UAE) ప్రభుత్వాలకు చెందిన సంబంధిత విభాగాలపై కూడా పరిహారం కోసం దావా వేసే అవకాశాన్ని పరిశీలిస్తున్నట్లు కథనాలు వెల్లడించాయి. ప్రయాణికులు తమ మధ్య వాట్సాప్‌ ద్వారా చర్చించుకుంటూ తదుపరి చర్యలపై సమన్వయం చేసుకుంటున్నట్లు సమాచారం.
ఒక్కొక్కరికి రూ.2 కోట్లకు పైగా పరిహారం?
ఈ ఘటనకు సంబంధించి ఒక్కో ప్రయాణికుడికి సుమారు 2 లక్షల నుంచి 2.5 లక్షల డాలర్ల వరకు పరిహారం లభించే అవకాశం ఉందని ఇజ్రాయెల్‌ మీడియాలో గతంలో ప్రచురితమైన కథనాల్లో న్యాయ నిపుణుల అంచనాలను ప్రస్తావించారు. భారత కరెన్సీలో ఇది సుమారు రూ.1.9 కోట్ల నుంచి రూ.2.4 కోట్ల వరకు ఉంటుంది.
అయితే, ఈ మొత్తం ప్రయాణికులకు ఖరారైన పరిహారం కాదు. న్యాయపరమైన చర్యలు, వర్తించే చట్టాలు, వ్యక్తిగతంగా ఎదురైన నష్టం, సంబంధిత ఆధారాలను బట్టి పరిహారం నిర్ణయమయ్యే అవకాశం ఉంది. ప్రయాణికుల తరఫున దావా దాఖలైతే ఈ వ్యవహారం అంతర్జాతీయ విమానయాన భద్రత, ప్రయాణికుల హక్కులపై మరోసారి చర్చకు దారితీయవచ్చు.
ప్రస్తుతం ప్రయాణికుల పరిహార డిమాండ్లు, చట్టపరమైన చర్యలకు సంబంధించిన ప్రక్రియపై దృష్టి నెలకొంది. ఈ కేసులో తుది పరిణామాలు ఎలా ఉంటాయన్నది ఆసక్తికరంగా మారింది.
