చిన్న శ్రీనుగారి కుమార్తెకు అండగా కూటమి నేతలు

తండ్రి అడుగుజాడల్లో ప్రజాసేవ చేస్తానని వెల్లడి

విజయనగరం: మాజీ జడ్పీ చైర్‌పర్సన్ మజ్జి శ్రీనివాసరావు (చిన్న శ్రీను) కుమార్తె మజ్జి సిరిసహస్ర కొత్తవలస మండలం, తెర్లాం మండలం జడ్పిటిసి స్థానాలకు తెలుగుదేశం పార్టీ అభ్యర్థిగా నామినేషన్ పత్రాలు దాఖలు చేశారు. బొబ్బిలి ఎమ్మెల్యే బేబీనాయన, ఎస్.కోట ఎమ్మెల్యే కోళ్ల లలిత కుమారి, మాజీ ఎమ్మెల్యే మరియు బుడా చైర్మన్ తెంటు లక్ష్మీ నాయుడుల ఆధ్వర్యంలో ఆమె తన నామినేషన్లను అధికారులకు అందజేశారు. రెండు మండలాల నుంచి పెద్ద సంఖ్యలో కూటమి నాయకులు, కార్యకర్తలు తరలివచ్చి ఆమెకు సంఘీభావం తెలిపారు.

కార్యకర్తలకు ఎప్పుడూ అందుబాటులో ఉంటా: సిరిసహస్ర

నామినేషన్ అనంతరం సిరిసహస్ర మాట్లాడుతూ, తన తండ్రి చిన్న శ్రీను చూపిన బాటలో నడుస్తూ ప్రజలకు సేవ చేస్తానని తెలిపారు. ఎప్పటిలాగే కార్యకర్తలకు నిత్యం అందుబాటులో ఉంటూ, వారి సమస్యల పరిష్కారానికి కృషి చేస్తానని హామీ ఇచ్చారు.

స్థానిక ఎన్నికల్లో విజయం ఖాయం: ఎమ్మెల్యే బేబీనాయన

బొబ్బిలి ఎమ్మెల్యే బేబీనాయన మాట్లాడుతూ, స్థానిక సంస్థల ఎన్నికల్లో తెలుగుదేశం పార్టీ విజయదుందుభి మోగించడం ఖాయమని ధీమా వ్యక్తం చేశారు. తమ నియోజకవర్గం నుంచి చిన్న శ్రీను కుమార్తె సిరిసహస్ర పోటీ చేయడం అభినందనీయమన్నారు. గడిచిన రెండున్నరేళ్లలో కూటమి ప్రభుత్వం సాధించిన అభివృద్ధే స్థానిక ఎన్నికల్లో విజయానికి సోపానమవుతుందని పేర్కొన్నారు. కూటమి నాయకులంతా సమష్టిగా పనిచేసి జడ్పీ ఎన్నికల్లో నూటికి నూరు శాతం ఫలితాలు సాధిస్తామని చెప్పారు.

చంద్రబాబు, లోకేష్ ఆశీస్సులతో బరిలోకి: చిన్న శ్రీను

మాజీ జడ్పీ చైర్‌పర్సన్ మజ్జి శ్రీనివాసరావు (చిన్న శ్రీను) మాట్లాడుతూ, టీడీపీ జాతీయ అధ్యక్షుడు నారా చంద్రబాబు నాయుడు, యువనేత నారా లోకేష్ ఆశీస్సులతో తన కుమార్తె జడ్పిటిసిగా పోటీ చేస్తున్నారని తెలిపారు. కూటమి ప్రభుత్వం చేసిన అభివృద్ధిని ప్రతి గడపకూ తీసుకెళ్తామన్నారు. ఇప్పటికే అన్నిచోట్లా ప్రజలు కూటమి ప్రభుత్వానికి బ్రహ్మరథం పడుతున్నారని, స్థానిక ఎన్నికల్లోనూ విజయఢంకా మోగించడం ఖాయమని అన్నారు.

ఈ కార్యక్రమంలో నెల్లిమర్ల మాజీ ఎమ్మెల్యే బడ్డుకొండ అప్పలనాయుడు, ప్రదీప్ నాయుడు,కొత్తవలస, తెర్లాం మండలాల కూటమి నాయకులు, కార్యకర్తలు పాల్గొన్నారు.