ఆలమూరు : కోనసీమ జిల్లా ఆలమూరు మండల కేంద్రంలోని తహసీల్దార్ కార్యాలయం ఎదుట ధర్నా చౌక్‌లో గ్రామ రెవెన్యూ సహాయకుల (వీఆర్ఏల) సంఘం చేపట్టిన నిరవధిక సమ్మె మంగళవారం నాటికి 28వ రోజుకు చేరుకుంది. ఈ సమ్మెకు ఆంధ్రప్రదేశ్ రాష్ట్ర ఐక్య కాపునాడు ట్రెజరర్, డాక్టర్ బి.ఆర్. అంబేద్కర్ కోనసీమ జిల్లా కాపు సంఘం అధ్యక్షుడు, ప్రముఖ వ్యాపారవేత్త, జాతీయ సేవా పురస్కార గ్రహీత డాక్టర్ చల్లా ప్రభాకర్ రావు మద్దతు తెలిపారు.

సమ్మె శిబిరాన్ని సందర్శించిన ఆయన వీఆర్ఏలతో మాట్లాడి సంఘీభావం ప్రకటించారు. వారి సమస్యలను ప్రభుత్వం పరిష్కరించాలని కోరారు.

కనీస వేతనం రూ.30 వేలు ఇవ్వాలి

ఈ సందర్భంగా డాక్టర్ చల్లా ప్రభాకర్ రావు మాట్లాడుతూ.. నిత్యావసర వస్తువుల ధరలు విపరీతంగా పెరిగిన ప్రస్తుత పరిస్థితుల్లో వీఆర్ఏలకు అందుతున్న నెలవారీ రూ.10,500 వేతనం ఏమాత్రం సరిపోవడం లేదన్నారు. ఇద్దరు, ముగ్గురు పిల్లలున్న కుటుంబాలు ఈ జీతంతో జీవనం సాగించడం చాలా కష్టమని పేర్కొన్నారు.

వీఆర్ఏలు కోరుతున్న విధంగా తెలంగాణలో అమలవుతున్న పే స్కేళ్లను ఆంధ్రప్రదేశ్‌లోనూ అమలు చేయాలని కూటమి ప్రభుత్వాన్ని కోరారు. వీఆర్ఏలకు కనీసం నెలకు రూ.30 వేల వేతనం అందించాలని డిమాండ్ చేశారు. 28 రోజులుగా సమ్మె చేస్తున్న వీఆర్ఏల సమస్యలపై ప్రభుత్వం సానుకూలంగా స్పందించి, వారి డిమాండ్లను పరిష్కరించి సమ్మె విరమణకు చర్యలు తీసుకోవాలని అన్నారు.

సమ్మెలో పాల్గొన్న వీఆర్ఏ సంఘం నాయకులు

ఈ కార్యక్రమంలో ఆలమూరు మండల గ్రామ రెవెన్యూ సహాయకుల సంఘం అధ్యక్షుడు తాతపూడి ఇషాక్, కార్యదర్శి కంతేటి శివరామారావు, ఉపాధ్యక్షుడు భువనగిరి ఏసు, సలహాదారు గూనపల్లి నాగేశ్వరరావు, కోశాధికారి కుందేటి శ్రీను పాల్గొన్నారు.

అలాగే సభ్యులు యార్లగడ్డ జీవరత్నం, ఏడిద వెంకటాద్రి, బూరీగ మంగలక్ష్మి, చోడవరపు రామలక్ష్మి, కోట లక్ష్మి, షేక్ బషీర్ బీబీ, రొక్కాల దొరబాబుతో పాటు మండలంలోని పలువురు వీఆర్ఏలు పాల్గొన్నారు.