బొబ్బిలి, అక్టోబర్ 6: విజయనగరం జిల్లా బొబ్బిలి గ్రోత్ సెంటర్‌లోని బెర్రీ కంపెనీలో మంగళవారం సాయంత్రం అగ్ని ప్రమాదం చోటుచేసుకుంది. సాయంత్రం సుమారు 6.30 గంటల సమయంలో స్లాగ్ రీసైక్లింగ్ చేస్తుండగా అందులోని రాళ్లు, పిక్కలు మంటలు అంటుకోవడంతో ప్రమాదం జరిగినట్లు సమాచారం.
మంటలు ఒక్కసారిగా చెలరేగడంతో అక్కడ ఉన్న లారీ డ్రైవర్ భయాందోళనకు గురై పరుగులు తీశాడు. ఈ క్రమంలో జారి పడటంతో అతడి కాలికి గాయం అయినట్లు సమాచారం. వెంటనే అతడిని చికిత్స కోసం తరలించారు.
మంటలను అదుపులోకి తీసుకురావడానికి బొబ్బిలి, సాలూరు, పార్వతీపురం, గజపతినగరం నుంచి ఫైర్ ఇంజిన్లను రప్పించారు. అగ్నిమాపక సిబ్బంది తీవ్రంగా శ్రమించి మంటలను అదుపులోకి తీసుకువచ్చే చర్యలు చేపట్టారు.
సమాచారం అందుకున్న వెంటనే బొబ్బిలి ఎమ్మెల్యే బేబీ నాయన, బొబ్బిలి డీఎస్పీ, సీఐ, ఎస్సైలతో పాటు పోలీసు సిబ్బంది ఘటనాస్థలానికి చేరుకుని పరిస్థితిని పర్యవేక్షించారు. కంపెనీలో ఉన్న కార్మికులు భయాందోళనకు గురికాకుండా అధికారులు చర్యలు చేపట్టారు.
ఈ ఘటనపై ఎమ్మెల్యే బేబీ నాయన స్పందిస్తూ.. ఫైర్ సేఫ్టీ నిబంధనలు పాటించారా లేదా అనే అంశంపై బుధవారం పూర్తి స్థాయిలో విచారణ జరిపిస్తామని తెలిపారు. రెవెన్యూ, ఫైర్, పోలీసు శాఖల అధికారులతో విచారణ చేయించి లోపాలను గుర్తిస్తామని చెప్పారు.
ఇలాంటి ఘటనలు మరోసారి జరగకుండా అవసరమైన చర్యలు తీసుకుంటామని, కార్మికులకు అన్ని విధాలుగా అండగా ఉంటామని ఎమ్మెల్యే హామీ ఇచ్చారు.
ప్రమాదానికి అసలు కారణం, ఆస్తి నష్టం తదితర పూర్తి వివరాలు అధికారుల విచారణ అనంతరం వెల్లడికానున్నాయి.
