విశాఖపట్నం సిటీ, సీతమ్మధారలోని ఈనాడు రైతు బజార్ సమీపంలో గల ఆక్సిజన్ టవర్-A, ఫ్లాట్ నెం.2409లో 18 మద్యం బాటిళ్లు, మొత్తం 19 లీటర్ల మద్యం స్వాధీనం చేసుకున్నట్లు మువ్వలవానిపాలెం పోలీసులు తెలిపారు.
విశాఖపట్నం సైబర్ క్రైమ్ పోలీస్ స్టేషన్‌లో నమోదైన క్రైమ్ నెం.144/2026 కేసు దర్యాప్తులో భాగంగా, గౌరవ చీఫ్ జ్యుడీషియల్ మేజిస్ట్రేట్, విశాఖపట్నం వారి నుండి సెర్చ్ వారెంట్ పొందిన సైబర్ క్రైమ్ పోలీసులు, తేదీ 08.10.2026న మధ్యాహ్నం 13:50 గంటలకు సదరు కేసులోని A-1 సుగ్గుణ గీత ప్రసన్న, భర్త శివనారాయణ (A-4) నివాసంలో సోదాలు నిర్వహించారు.
ఈ సోదాల్లో వివిధ బ్రాండ్లకు చెందిన మొత్తం 18 మద్యం బాటిళ్లు, 19 లీటర్ల పరిమాణంలో ఉన్నట్లు గుర్తించి, సాక్షుల సమక్షంలో సెర్చ్ అండ్ సీజర్ పంచనామా ద్వారా స్వాధీనం చేసుకున్నారు. సదరు సైబర్ క్రైమ్ కేసుకు సంబంధించిన నిందితులు ప్రస్తుతం జ్యుడీషియల్ కస్టడీలో ఉన్నారు. స్వాధీనం చేసుకున్న మద్యం బాటిళ్లను, సెర్చ్ పంచనామా మరియు సంబంధిత పత్రాలతో సహా సైబర్ క్రైమ్ పోలీస్ స్టేషన్ ఇన్‌స్పెక్టర్ గారు తదుపరి చట్టపరమైన చర్యల నిమిత్తం ఎం.వి.పి. పోలీస్ స్టేషన్‌కు అప్పగించారు.
సుగ్గుణ గీత ప్రసన్న మరియు ఆమె భర్త శివనారాయణలపై ఆంధ్రప్రదేశ్ ఎక్సైజ్ చట్టం ప్రకారం ఎం.వి.పి. పోలీస్ స్టేషన్‌లో కేసు నమోదు చేసి, తదుపరి దర్యాప్తు నిమిత్తం సర్కిల్ ఇన్‌స్పెక్టర్ కె.ఎన్.ఎస్.వి. ప్రసాద్ గారు సబ్ ఇన్‌స్పెక్టర్ జి. సీతారాం గారికి అప్పగించారు.
