జీవీఎంసీ పరిధిలో ఫిర్యాదులకు నాణ్యమైన పరిష్కారం చూపాలి.. 10 జోన్లకు ప్రత్యేక గ్రీవెన్స్‌ రెడ్రెస్సల్‌ లాగిన్లు ఏర్పాటు చేయాలని ఆదేశం

విశాఖపట్నం: ప్రజా సమస్యల పరిష్కారంలో అధికారులు నిర్లక్ష్యం వహించకూడదని జిల్లా కలెక్టర్‌ ఎం. అభిషిక్త్‌ కిశోర్‌ స్పష్టం చేశారు. కలెక్టరేట్‌ సమావేశ మందిరంలో సోమవారం నిర్వహించిన ప్రజా ఫిర్యాదుల పరిష్కార వ్యవస్థ (పీజీఆర్ఎస్‌) కార్యక్రమంలో వివిధ అంశాలపై ఆయన సుదీర్ఘంగా సమీక్షించారు. ముఖ్యంగా జీవీఎంసీ పరిధిలో ప్రజల నుంచి అందుతున్న వినతులకు నాణ్యమైన పరిష్కారం చూపడంలో లోపాలు ఉన్నాయని అసంతృప్తి వ్యక్తం చేశారు.

ఫిర్యాదుల పరిష్కారంలో నాణ్యతకు ప్రాధాన్యం

ప్రజలు అందించే ప్రతి వినతిని అధికారులు బాధ్యతగా పరిశీలించాలని కలెక్టర్‌ సూచించారు. ఫిర్యాదుల పరిష్కారానికి సంబంధించి సరైన నివేదికలు సమర్పించకపోవడం, ప్రజలతో నేరుగా మాట్లాడకుండా సమస్యలను పరిష్కరించినట్లు చూపించడం వంటి అంశాలపై ఆయన దృష్టి సారించారు. ఇంప్రాపర్‌ రెడ్రెస్సల్‌, ప్రీ ఆడిట్‌, సూపర్‌ ఆడిట్‌ ప్రక్రియల్లో తప్పులు గుర్తించిన అధికారులను పిలిపించి వివరణ కోరారు.

వినతిదారులతో నేరుగా మాట్లాడి సమస్య స్వరూపాన్ని తెలుసుకోవాలని, సంబంధిత అంశాలను క్షేత్రస్థాయిలో పరిశీలించి వాస్తవ పరిస్థితులకు అనుగుణంగా పరిష్కారం చూపాలని అధికారులకు స్పష్టం చేశారు.

10 జోన్లకు ప్రత్యేక లాగిన్లు ఏర్పాటు చేయాలి

జీవీఎంసీ పరిధిలోని పది జోన్లకు పది ప్రత్యేక గ్రీవెన్స్‌ రెడ్రెస్సల్‌ అధికారి లాగిన్లను ఏర్పాటు చేయాలని కలెక్టర్‌ ఆదేశించారు. దీనివల్ల ఆయా జోన్ల పరిధిలో వచ్చే ఫిర్యాదులపై సంబంధిత అధికారులు మరింత బాధ్యతతో వ్యవహరించేందుకు, పరిష్కార ప్రక్రియను పర్యవేక్షించేందుకు వీలవుతుందని పేర్కొన్నారు.

వినతులకు సరైన నివేదికలు ఇవ్వని, ప్రజలతో నేరుగా మాట్లాడని ముగ్గురు అధికారులను పిలిపించి వివరణ కోరారు. సమీక్షకు హాజరుకాని అధికారులకు షోకాజ్‌ నోటీసులు జారీ చేయాలని పీజీఆర్ఎస్‌ నోడల్‌ అధికారిని ఆదేశించారు.

వినతుల నమోదు నుంచే స్పష్టత ఉండాలి

ప్రజలు అందించే దరఖాస్తులను నమోదు చేసే సమయంలోనే అవి ఫిర్యాదుల పరిష్కారం కిందకు వస్తాయా, లేక సర్వీస్‌ రిక్వెస్ట్‌ కిందకు వస్తాయా అన్నది స్పష్టంగా గుర్తించాలని కలెక్టర్‌ సూచించారు. వాటి స్వభావానికి అనుగుణంగా సరైన విభాగంలో నమోదు చేసి, తదనుగుణంగా చర్యలు చేపట్టాలని తెలిపారు.

ఫిర్యాదులను తప్పుగా వర్గీకరించడం వల్ల పరిష్కారంలో జాప్యం జరగకుండా అధికారులు జాగ్రత్తలు తీసుకోవాలని పేర్కొన్నారు. ప్రతి దరఖాస్తు పరిష్కారంలో పారదర్శకత, జవాబుదారీతనం ఉండాలని స్పష్టం చేశారు.

ప్రజల సంతృప్తే లక్ష్యం

పీజీఆర్ఎస్‌ వ్యవస్థపై రాష్ట్ర ముఖ్యమంత్రి స్వయంగా పర్యవేక్షణ చేస్తున్నందున అధికారులు ఈ కార్యక్రమానికి అధిక ప్రాధాన్యం ఇవ్వాలని కలెక్టర్‌ సూచించారు. ప్రజలకు నాణ్యమైన సేవలు అందించడంతో పాటు, వారి సమస్యలకు సకాలంలో పరిష్కారం చూపాలని ఆదేశించారు.

ప్రజల సంతృప్తి స్థాయి మరింత పెరిగేలా అన్ని శాఖల అధికారులు సమన్వయంతో పనిచేయాలని తెలిపారు. సమీక్షలో జాయింట్‌ కలెక్టర్‌ గొబ్బిళ్ల విద్యాధరి, డీఆర్వో ఎం. విశ్వేశ్వరనాయుడు, అదనపు కమిషనర్‌ సత్యవేణి, పీజీఆర్ఎస్‌ నోడల్‌ అధికారి శేషశైలజతో పాటు వివిధ శాఖల అధికారులు పాల్గొన్నారు.