విశాఖపట్నం: విశాఖ నగరంలోని ఎంవీపీ కాలనీలో ఉన్న మ్యాక్స్ విజన్ సూపర్ స్పెషాలిటీ కంటి ఆసుపత్రి ఆధ్వర్యంలో వరల్డ్ సైట్ డేను ఘనంగా నిర్వహించారు. ఈ సందర్భంగా వైద్యులు, విద్యార్థులు భారీ అవగాహన ర్యాలీ నిర్వహించి ప్రజలకు కంటి ఆరోగ్యం, దృష్టి సమస్యలపై అవగాహన కల్పించారు.
కంటి ఆరోగ్యంపై ప్రజల్లో చైతన్యం తీసుకురావడం, దృష్టిలోపాలను ప్రారంభ దశలోనే గుర్తించి తగిన చికిత్స తీసుకునేలా అవగాహన కల్పించడమే కార్యక్రమం ప్రధాన ఉద్దేశంగా నిర్వాహకులు తెలిపారు.
ఈ కార్యక్రమంలో డాక్టర్ కే. పద్మజ, ఆసుపత్రి జీఎం ప్రదీప్, డాక్టర్ శ్రీనివాసరావు, డాక్టర్ బాబురావు తదితరులు పాల్గొన్నారు. ఈ సందర్భంగా వారు మాట్లాడుతూ.. “సర్వేంద్రియానాం నయనం ప్రధానం” అన్నట్లుగా మనిషి జీవితంలో కళ్లకు ఎంతో ప్రాధాన్యత ఉందని పేర్కొన్నారు. ప్రతి ఒక్కరూ కంటి ఆరోగ్యంపై పూర్తి అవగాహన కలిగి ఉండాలని సూచించారు.
ముఖ్యంగా దృష్టిలోపాలు, కంటి సంబంధిత సమస్యలను నిర్లక్ష్యం చేయకుండా ముందస్తు చర్యలు తీసుకోవాలని వైద్యులు సూచించారు. వయసుతో సంబంధం లేకుండా క్రమం తప్పకుండా కంటి పరీక్షలు చేయించుకోవడం ద్వారా పలు సమస్యలను ప్రారంభ దశలోనే గుర్తించవచ్చని తెలిపారు.
అవసరమైన వారు వైద్యుల సూచనల మేరకు మందులు ఉపయోగించాలని, కంటి సమస్యలు ఉన్నప్పుడు స్వయంగా మందులు వాడకుండా నిపుణుల సలహా తీసుకోవాలని సూచించారు. విద్యార్థులు, యువతలో పెరుగుతున్న స్క్రీన్ వినియోగం నేపథ్యంలో కంటి ఆరోగ్యంపై ప్రత్యేక శ్రద్ధ అవసరమని వైద్యులు పేర్కొన్నారు.
వరల్డ్ సైట్ డే సందర్భంగా నిర్వహించిన అవగాహన ర్యాలీ ద్వారా ప్రజలకు కంటి ఆరోగ్యంపై పలు ముఖ్యమైన సూచనలు అందించారు. కంటి సమస్యలను ప్రారంభ దశలోనే గుర్తించి తగిన వైద్య సేవలు పొందడం ద్వారా దృష్టిని కాపాడుకోవచ్చని నిర్వాహకులు తెలిపారు.
